Diqqat! Saytda texnik ishlar olib borilmoqda.
Ру Ўз Uz

Ko'p beriladigan savollar

1. Savol: Agent sertifikatini olish uchun yuridik shaxs yoki jismoniy shaxs boʻlishi kerakmi?

Javob: Vazirlar Mahkamasining 2021-yil 19-apreldagi 221-son qarori bilan tasdiqlangan nizomga koʻra, sertifikat olish uchun murojaat qiluvchi yakka tartibdagi tadbirkor (xodimi) yoki yuridik shaxs maqomidagi tadbirkorlik subyektining xodimi boʻlishi lozim.

2. Savol: Agent sifatida xizmat koʻrsatish uchun tadbirkorlik subyektining binosi yoki ish oʻrniga talablar bormi?

Javob: Hukumat tomonidan tasdiqlangan nizomga asosan agentlik sertifikatini olishda moddiy-texnik bazaga quyidagi talablar mavjud: davlat xizmatini koʻrsatish uchun kamida 15 m2 maydonga ega boʻlgan bino mavjudligi, davlat xizmatini koʻrsatuvchi har bir xodim kompyuter va boshqa zarur tashkiliy texnika bilan taʼminlanganligi, kamida 5 kishi uchun moʻljallangan kutish oʻrindiqlari mavjudligi, nazorat-kassa texnikasi va (yoki) hisob-kitob terminallari oʻrnatilganligi.

3. Savol: Nomimdagi shaxsiy avtomobilimni sotmoqchi edim, notariusga turmushga chiqmaganligimni isbotlashim shartmi?

Javob: Oʻzbekiston Respublikasi Prezidentining 2021-yil 23-martdagi PF–6191-son Farmoniga asosan 2021-yil 1-iyundan boshlab notarial harakatlarni amalga oshirishda fuqarolik holati dalolatnoma yozuvlari bilan bogʻliq barcha maʼlumotlar notarial idoralar tomonidan mustaqil ravishda, fuqarolardan ortiqcha maʼlumot talab qilmasdan, “FHDYOning yagona elektron arxivi” axborot tizimi orqali olinadi.

Shunga koʻra, iyun oyidan boshlab notariuslar bitimlarni rasmiylashtirishda Sizdan oilaviy ahvolingiz toʻgʻrisida FHDYOdan maʼlumotnoma talab qilishsa Adliya vazirligi va Agentlikning ishonch telefonlariga murojaat qilishingiz mumkin.

4. Savol: Joriy yilning 3-may kuni ingliz tilidan xalqaro imtihon topshirib, IELTS sertifikatini oldim. Umumiy natijam 7.5 ballni tashkil qildi. Menga ushbu natijam boʻyicha imtihon xarajatim qoplab beriladimi?

Javob: Vazirlar Mahkamasining 2021-yil 13-apreldagi 209-son qaroriga asosan 2021-yil 1-maydan boshlab International English Language Testing System (IELTS) tizimida kamida 7 ball olgan yoshlarimizga imtihon topshirish xarajatlarini toʻliq qoplab beriladi.

5. Savol: Vazirlar Mahkamasi qarori bilan Davlat xizmatlari agentligi huzurida Axborot xizmatlarini rivojlantirish markazini tashkil etish belgilangandi. Ushbu Markazni tashkil etish orqali aholi va tadbirkorlik subyektlariga qanday yengillik va qulayliklar yaratish nazarda tutilmoqda?

Javob: Qarorga muvofiq yangi tashkil etiladigan Markaz aholi va tadbirkorlik subyektlariga huquqiy masalalar boʻyicha bepul maslahat va tushuntirishlar berish, aholi va tadbirkorlarga koʻrsatiladigan davlat xizmatlari toʻgʻrisidagi maʼlumotlarni YAIDXPda joylashtirib borish, aholi va tadbirkorlik subyektlaridan murojaatlarni qabul qilish boʻyicha Yagona davlat xizmatlarini koʻrsatish axborot-aloqa markazi faoliyatini tashkil etish kabi vazifalar belgilangan.

6. Savol: Aytishlariga qaraganda, xususiy sektor vakillariga haydovchilik guvohnomasi uchun imtihon olish huquqi berilibdi. Agar imtihon olish huquqi yoʻl harakati xavfsizligi xodimlarining nazoratidan chiqib ketsa, haydashni bilmaydigan odamlar ham guvohnoma olish holatlari koʻpayib ketmaydimi? Ularni kim nazorat qiladi?

Javob: Vazirlar Mahkamasining “Yoʻl harakati xavfsizligi sohasida davlat xizmatlari koʻrsatish tartib-taomillarini soddalashtirish chora-tadbirlari toʻgʻrisida” 2021-yil 4-maydagi 271-son qaroriga asosan haydovchilik guvohnomasini olish uchun nazariy va amaliy imtihonlar Davlat yoʻl harakati xavfsizligi xizmati vakilining bevosita yoki onlayn nazorati ostida oʻtkaziladi.

7. Savol: Bundan buyogʻiga haydovchilik guvohnomasini olishga nomzodlar yoʻl harakati xavfsizligi boʻlimlarida ham, xususiy imtihon oluvchi tashkilotlarda ham haydovchilik imtihonini topshira olishadimi? Bir joyning oʻzida ham Davlat tashkilotida, ham xususiy tashkilotda imtihon topshirish nega kerak? Bir joyning oʻzida imtihon oluvchi YHXB boʻlimlarining mavjudligi tadbirkorlarga halal bermaydimi?

Javob: Vazirlar Mahkamasining “Avtotransport vositalarini boshqarish huquqini beruvchi haydovchilik guvohnomalarini olish uchun imtihonlarni oʻtkazish sohasiga xususiy sektorni jalb etishga doir qoʻshimcha chora-tadbirlar toʻgʻrisida” 2021-yil 4-maydagi 272-son qaroriga asosan 2021-yilning 1-iyunidan boshlab Ichki ishlar vazirligiga haydovchilik guvohnomasini olish uchun nazariy va amaliy imtihonlarni oʻtkazish huquqiga ega boʻlgan tadbirkorlik subyektlari xizmat koʻrsatish hududlarida Davlat yoʻl harakati xavfsizligi xizmatining nazariy va amaliy imtihonlarni oʻtkazish boʻyicha faoliyatini tadbirkorlik subyektlarining tegishli litsenziyasi amal qilish sanasidan eʼtiboran toʻxtatish vazifasi yuklatilgan.

8. Savol: Xalqaro imtihon tizimlari boʻyicha yuqori ball (daraja) olgan yoshlarga imtihon topshirish xarajatlari boʻyicha kompensatsiya pulini olish boʻyicha qanaqa hujjatlar talab qilinadi va qancha muddatda kompensatsiya pulini olish mumkin?

Javob: Vazirlar Mahkamasining 2021-yil 13-apreldagi 209-son qaroriga muvofiq kompensatsiya pulini olish uchun soʻrovnomaga faqatgina imtihon topshirish xarajati toʻlanganini tasdiqlovchi toʻlov kvitansiyasi va maxsus sertifikat (ikkisi pdf formatda) ilova qilinadi.

Xizmat koʻrsatish muddati 15 kun, agar qoʻshimcha oʻrganish holatlari boʻlsa, bu muddat yana 15 kunga uzaytiriladi.

Agar Sizning murojaatingiz ijobiy koʻrib chiqilsa, kompensatsiya pulini oʻzingiz soʻrovnomada koʻrsatgan Xalq bankining tegishli filialidan xohishingizga koʻra naqd yoki naqdsiz koʻrinishda olishingiz mumkin.

Belgilangan matnni tinglash uchun quyidagi tugmani bosing Powered by GSpeech
DXMga oldindan navbatga yozilish
DXMga elektron chipta olish
DXMlar xaritada
Murojaatingizni yo'llang!